101 POLOGNE

"We must be humble"

 ف حاجة عبيطة انهاردة حصلت واعتقد اني هاحب اوثق الموضوع ده. جدير بالذكر اني كنت بافكر اسكن لوحدي في ستوديو او غيره بس الأقدار قد صرفت الأمور بطريقة مختلفة. 

الاول كنت بافكر اسكن في السكن الجامعي ودي حاجة لطيفة خالص بس تراجعت لما لقيت ان هايبقى في حد  قاعد معايا في نفس الاوضة ليل نهار.. الموضوع مش شخصي خالص بس يعني انا بافضل ابقى لوحدي في الاوضة عشان مازعجش حد ولا حد يزعجني وعشان طبعا فاكرة حكاية السفر مع ميشيل الأمريكية والبيات معاها في نفس السرير وقد ايه ده كان ميسد أب.

المهن.

قلتلهم يا جماعة السكن الجامعي, طيب انا عايزة اوضة سينجل والنبي وهادفع معنديش مشكلة خالص وانا محجبة وبتاع وهايبقى صعب وكدة, طب انا طالبة ماجيستير وكدة, ردوا عليَّ قالولي  يا آنسة السناجل دي بتبقى اولوية وصعب قوي نديهالك بس لو اديناهالك هاتعرفي لما توصلي.

وقد كان هذا المرغوب فيه في الأول.

في النص جت فكرة اننا نأجر شقة ثلاثية: ليا وأجات وانا. 

البنتين الفرنساويات, الأولى من بوردو والتانية من باريس.
ليا مجنونة وعبيطة اعتقد اني سعيدة قوي اني لقيت حد أعبط مني بس ليا الجميل فيها انها تلقائية جدا جدا هي مش محتاجة تعمل ده عشان حد. في واحد من أحاديثها كانت بتحكي ان هي كدة الست اللي هي عايزة تبقاها, ولو كانت كملت في علاقتها الأولانية بإتيان مكانتش هاتبقى الشخص اللي هي عايزة تكونه.

أجات من باريس, اصغر واحدة في دفعة الماجيستير, أكتر واحدة مختلفة بشكل او بآخر وليها سمت كدة. يعني أجات اول حاجة ممكن تتلاحظ فيها انها شكلها روسي جدًا او يمكن ده تخيلي عشان اول يوم شفتها فيه كانت لابسة حلق معمول بالعرايس الروسية.

أجات كومباشينيت جدًا يعني فعلًا سريعًا بتتأثر كدة وتلاقيها بتغمر البني آدمين حواليها بالحنان والأحضان والبوس. واحدة من الحاجات اللي باحسها مختلفة قوي في اجات انها لما بتيجي تبوس حد, مش بتحط خدها على خده زي المتبع لكن بتتوجه بكل وشها وكل جوارحها تجاه خده لبوسة من القلب بجد.

قلت لأجات في ليل إني مش عايزة ادفع كتير, أخري 200 يورو او 250 بالكتير قوي قوي قوي. انا مش عايزة ادفع كتير الحقيقة وعايزة احوش من مصروفي. أجات قالت اوكيك, هانحاول نتدبر الأمر.

وقد كان.

أجات سعت في الموضوع فعلا ودورت على شقة في المدينة البولندية اللطيفة "فراتسواف" ولقت شقة لطيفة وبعتت قريبتها اللي عايشة في بولندا في بلد تانية عشان تبص على الشقة وتصور فيديو وتقولنا رأيها.

الشقة جميلة, فيها خشب كتير ودي من أكتر الحاجات اللي انا مبسوطة بيها, خشب خشب ايفري وير الواحد يحس انه محظوظ بكل هذه النعم, الناس, الخشب والشقة وكله كله.

أجرنا الشقة عن بعد والحمدلله ماكنتش مقلب على الاطلاق.

لأننا كنا جايين قبل ما الشهر ييجي, الناس اللي ساكنين في الشقة اقترحوا انهم يستضيفونا يومين, اول يوم نمنا على الكنبة وتاني يوم نمنا على كنبة سرير وهو اختراع لطيف للغاية, تالت يوم مشيوا واخدنا الشقة.

الأول كنت فاكرة اني هاخد الأوضة اللي فيها سريرين بس شكل أجات هاتاخدها ويمكن كمان تدفع شوية أكتر (ده معناه أقل ليا انا وليا).
أخدت الأوضة اللي في النص, خشب كتير في كل مكان, الاوضة واسعة قوي, اوسع من اوضتي في مصر واوسع طبعا من ال9 متر بتوع فرنسا, فرنسا الئمح.

أول يومين في فراتسواف فعلا نعمة, الحمدلله على وجود ليا. وجودها جميل ومسلي وممتع, هي فعلا مهتمة بالبني آدمين اللي قدامها مهتمة تخلق علاقة قوية, مهتمة تعرف الاصل والفصل ودي حاجة جميلة وصادقة جدًا.

كل هذه القصة ليه؟ عشان موقف الصباح الجميل.

انهاردة اول يوم اصحى من فترة بعيدة من غير اي حاجة, حلمت حلم وآخره كان في سورة الأنعام. صحيت صليت الفجر لاول مرة من وقت طويل جدًا وقريت شوية في سورة الأنعام ومن ثم صليت الشروق وحاولت أنام بس ماعرفتش.

قمت بقى وحضرت فطاري اللذيذ اللي حرقته امبارح بس لازم أكله يعني مش هارميه.
من النعم والبركات يعني ان الناس اللي قبلينا سايبين لنا أكل كتير وجميل وحاجات لسة ماتفتحتش وبتاع, منها مجموعة كبير من عين الجمل. بس عين الجمل اللي مش متكسر.

كان في واحد معانا في ليل اسمه جيل, هيبي في نفسه كدة وكان بيقعد في المحاضرات يكسر مع نفسه بإيده ثمرة عين الجمل من غير اي حاجة ويقعد يحدفلنا اللي جوه الثمرة الناشفة.

قلت بقى انا مش اقل منه, مفيش اي حاجة في البيت تقدر تخلينا نكسر الثمرة فهاستخدم إيدي.
مسكت اتنين وقلت بسم الله, مفيش ايتها حاجة حصلت.

ليا برضة مسكت اتنين وحاولت بفف مفيش.

قلت لأ لأ هاعملها يعني هاعملها, وهوب تريك تراك اتكسرت واحدة ! 

اتبسطت قوي قوي وجربت اعمل واحدة تانية واتعملت فعلا.

ياااااهووووو!! قلت ل ليا , بصي علي وانا برو قد الدنيا في تكسير ثمرة عين الجمل.

حاولت بقى مرة تانية,اكمني بقيت برو وبتاع, اني اعرف اكسر اي واحدة بففف مفيش!
كل محاولاتي باءت بالفشل..

لما قلت لليا بصت لي كدة بطريقة عادية جدًا بس اللي هو خلينا نقول انها بصتلي بطريقة سينمائية جدًا وبانكليزية مخلوطة بلكنة فرنسية قالتلي: ".that's because we must be humble"

آآآند ذاتس ات. هذا ما حدث صباح هذا اليوم في فراتسواف.

انا ممتنة قوي قوي للتجربة دي, ممتنة للسكن في نفس المكان مع هذه الأرواح اللطيفة الطيبة, صحيح باتسائل كل شوية يا ترى امتى هاينكشف عن المحجوب ونشوف الجانب السيئ ليهم, بس حتى الآن مش قادرة اشوف جانب سيئ وده بيأكدلي ازاي انا محتاجة اشتغل على نفسي وانقيها واكون توازني من جديد.

أعتقد بعدين هاحكي قصة إتيان وليا و the woman that I want to be.