بوست الوداع

انا مش كويسة
او يعني مش عارفة
انا  هاسافر 5 شهور 

هابعد عن اهلي تاني

هافضل سنتين مش مستقرة بالف في أرجاء المدن والبلاد

يا الله 

دي كانت رغبتي مش كدة؟ اني اسافر بعد فترة من الاستقرار 

انا حاليا مش قادرة افكر غير في حضن طويل وحب وقدرة على التفهم والاستيعاب..

باتسائل الناس العزاب عايشين ازاي؟ وباتسائل انا هاعيش ازاي من غير ماما وبابا..

اتس سو هارد اول اوفر ايجين..

نيكول كانت بتحكيلي على صاحبها وانه ازاي متعلق بعيلته في كولومبيا بس من ساعة ما سافر وهو مشغل الاكتفاء الذاتي. عشان كدة هي حتى مش عارفة تتعامل معاه وهو مش عارف ياخدها في حياته... اتس سو هارد.

منة كانت بتحكيلي ان الحياة كانت الطف بكتير قبل وحش الرأسمالية والثورة الصناعية وان كل اللي الحداثة عملته هي انها خلتنا واقعين في بير من المشاعر والاحاسيس وعايزين اكتر واكتر واكتر.

هل ده حقيقي؟ مش عارفة يا مصر مش عارفة.

يا بلادي انا امتى هاكبر... انا باخرف بس دماغي فعلا بهذه العشوائية.

* * *

انا عندي دايما هذا الحنين 

الحنين للحظات اللي اهلي بيحضنوني فيها بحب وباعيط فيها. للحظات اللي كنت مرتاحة جنبه وهو حاضنني ونايمين. للحظات الامتنان لأذواقنا الموسيقية المتقاربة واني ممكن ابقى قطة صغيرة جدا جدا معاه بيدلعني وبياخد باله مني.

انا بادرك في مراجعاتي الشخصية اني ماكنتش عادلة كفاية مع اي حد حبيته. بشكل او بآخر ماكنتش كريمة زي ما آلين دو بوتون بيقول في علاقتي. ماكنش في هذه المساحة من تفهم الأشخاص اللي بحبهم واني اسيب مساحة لعيوبهم واتفهمهم واحبهم.

انا بادرك ده متأخر وانا عارفة ويمكن بادركه لأني مشتاقة للحالة الجميلة والعلاقة اللطيفة. بس لا ندري يعني لعل الله يحدث بعد ذلك أمرا او لأ برضة.

العربية ضاعت في المعادي ومحفظتي ضاعت ورجعت والكارت اتوقف. والله كل ده حصل.

بس انا مش عارفة افكر غير ان ربنا كان كريم قوي قوي قوي معايا. جدا جدا.

ممتنة قوي لوجود نجم القوي في حياتي الفترة دي.

انا تقريبا عيطتله كتير قوي قوي من ساعة ما جيت. بس هو بيطبطب وبيتفهم بطريقته الخاصة جدًا جدًا.

نجم هزاره غريب ومش بفهمه بس انا بحبه وبحب شعره الأحمر هيهيهي ومش باعرف اتعامل قوي ولا انكشه لما يبقى موجود بس برضة
ساتش اا ويرد ريليشنشيب.

*  *  *

انا عندي سرير زيادة في اوضتي وانا مبسوطة قوي لده. جدا جدا جدا. صحيح هادفع كتير في بولندا وانا كنت فاكراها ارخص في الايجار بس قشطة انه اختياري الخاص
كان نفسي يا حلو تيجي تنورلي اوضتي شوية ونعيش سوا مع بعض..

بس نهى هاتيجي تزورني ونوغان ومش عارفة مين تاني ممكن يعدي علي

اني واي.. اتس اا نيو جيرني. ولسه فاضل اتنين جورني كمان ونشوف هانعمل ايه في حياتنا بعد كدة.

انا عندي 23 سنة والسنة اللي بعدها هاتم 24 وهايكون معايا ماجيستير..

انا مابقتش صغيرة خالص. 

مابقتش اصغر واحدة في المجموعات خلاص. 

كبرت وعجزت اهو

محتاجة طاقة كبيرة عشان احاول اكمل المسيرة اللي رسمتها دي.

محتاجة اصاحب نفسي ونبقى اكبر صحاب ومشجعين لبعض وكدة.

ايه تاني حصل في الفترة دي؟

ولا حاجة :) 

اي ام سينجل اند أي ام ريدي تو مينجل 

او مش عارفة الحقيقة هاهاها.

*   *   *

بتحضرني اغنية انا عندي حنين مابعرف لمين.

اعتقد اني كنت اقوي او باصد اكتر وانا صغيرة دلوقتي بقيت عبيطة اكتر واكتر يمكن ده عشان مش باعمل ضبط لنفسي؟ مثلا؟

انا مفتقدة قوي نقاشاتنا 

قوي قوي يا جازيا.

مفتقدة اختياراتك الموسيقية ومفتقدة روحك 

انا مابعتلكش اقولك اني فعلا كنت باقدر كل مرة بتحاول تمتص غضبي اللي انت مالكش دعوة بيه

انا شاكرة قوي لكل مرة انت ساعدتني افهم نفسي وافهم حاجات كتير بعيد عني

انا اسفة قوي ان الظروف مكانتش افضل معانا واني ماكنتش متفهمة وكنت اعبط واهبل واصغر سنا واقل نضجا

*    *    *

كفاية 

كفاية 

كفاية 

اي نيد تو مووف اون.