الفريد سافر...

غيداء العزيزة,

ازيك يا صديقة الطريق؟ كيف حالك؟ و كيف حال رحلتك؟ وصلتى فين؟ و قابلتى مين؟ و مين لسة مكمل معاكى؟

SoundCloud, أنا كنت مفتقدك الفترة اللى فاتت. بس رجعتيلى عبق وجودك بكام طرب جميل من بتوع ال

صاحبونى فى كذا سهراية فى لياليا اللى عدت.

فى البداية, احب اطمنك عليا, أنا الحمد لله صحتى بخير, ممكن بعطس بقالى كام يوم, بس مش حاسس باعراض برد. وقعت كام وقعة من على لوح التزلج الجديد بتاعى, سابت كام علامة زرقة عند ركبتى و قصبة رجلى اليمين, بس بصراحة التزلج ممتع جداً و يستاهل. الفترة اللى فاتت انا كنت بكتشف حاجات كثير كانت غامضة بالنسبالى بالتطبيق الفورى. مكنتش بستنى اتعلم الاول و بعدين اطبق زى ما كنت بعمل زمان ايام الprogramming, و الموضوع ده فادنى بانه بيدخلنى فى خبرة العمل على طول, بدل ما ادرس النظرى, وبعدين ميعجبنيش التطبيق, فازهق, او احس انى كنت بضيع وقت. و ممكن تكونى شفتى ده فى اللوحى اللى رسمتها لوالدتى فى عيد الأم.

غير كده, كنت بكمل اكتشافى لعالم جديد فى الاسكندرية, ناس جديدة, بفعاليات جديدة, و اماكن جديدة. يعنى بحاول اغمس نفسى فى اسكندريتى العزيزة. و ده مخلينى مملش, و بيسرع اكتشافى لحاجات جديدة مكنتش واعى بيها.

لسة شغال فى كورسات online و الحمد لله لسة متابع الAssignments اللى عليا و الquizzez و الذى منه. و مبسوط انى بدأت اعرف اهتم. الكورسات هى: *Intro to Finance History of Art Practical Ethics Meditation and modern psychology History of the Middle east (the past 200 years)

كلهم فى مجالات مختلفة, بس مش بعيد عن بعض. لسة بكتشف الجانب الفنى لشخصيتى. و الحاجات اللى اتحرمت منها بانى دخلت علمى مش ادبى.

فى الاسبوع اللى فات ده بدأت اكتش حاجة جديدة عليا تماماً, المسرح. الموضوع بدأ بزيارة لصديقة تعمل مدرسة فى كلية الفنون الجميلة, و وانا مستنيها, و باخد جولة فى الكلية, اتعرفت على شخص, قاللى انه مشارك فى مسرحية هتتعرض فى اليوم التالى (بكرة يوميها) و كان انى اخدت سندس و رحنا, كانت خبرة جميلة جداً.

و بعدها اكتشفت منظمة اسمها "لازم مسرح" عاملين كذا عرض فى اسكندرية لفرق من الدنمارك و المانيا, و كانت عروض حلوة اوى, غيرت فكرتى عن المسرح و المسرحيات. العروض: Romeo and Juliet My Room Money Comes from outer space (German) هتلاقى فيديو للاخير على vimeo

المهم انها كانت تجربة مكثفة, انى محضرتش مسرح فى حياتى, و بعدين احضر 4 عروض مسرحية فى خلال 10 ايام.

و اخيراً. الكلية. بصى, هو الموضوع ده معقد جداً لدرجة انى مش فاهمه, و تقريباً حياتى كلها بتلف حواليه, بس ملهاش علاقة بيه فى نفس الوقت. باختصار, بدأت احضر العملى اللى لازم احضره و الا حرمت من الامتحان, العملى اللى بيبقى 8 الصبح غالباً مش بعرف اصحاله, قررت احضر محاضرات (اللى هى بتبدأ 8 الصبح دايماً) و مقدرتش احضر الا يوم 1 (علماً انهم 3 ايام فى الاسبوع) . بكره تواجدى جوه الكلية, و جوه الحصص, و جوة المحاضرات...

للاسف دى عقدة حياتى. بحاول اتخطاها, بس حاسس ان هى دى اللى بتزقنى لكل حاجة باقيه.

اخر حاجة كمان, ان معرض مكتبة الاسكندرية للكتاب شغال, زرته مرتين, و خلصت 400 جنيه بحمد الله فى الحصول على قرابة ال 30 كتاب, فى مختلف المواضيع و من مختلف اللغات و محتوى. و قمت بانشاء 3 رفوف جديدة فى حجرتى, و تم ترتيب مكتبتى, و يمكننى الان استعارة اى كتاب فى اى وقت بدون مجهود émoticône smile

ده كان أنا. دلوقتى انت.

انت ازيك؟ ايه جديدك؟ يا ترى بتفكرى في ايه دلوقتى؟ يا ترى بتحلمى بايه دلوقتى؟ ياريت اعرف عن ده!

انت المرة اللى فاتت كنتى في حالة من الاستنارة الجميلة, اللى تقريباً المسج بتاعتى قاطعتك في نصها. أتمنى تكونى اتأكدتى من كل الحاجات اللى انت توصلتيلها ساعتها.

يا ترى بقى كملتى في طريقك؟ ولّا خذلتى نفسك؟ أتمنى تكون الأولى.

بس زى ما ممكن اعاتبك على حاجات, أتمنى متقسيش على نفسك, مهما كان. دايماً افتكرى ان مفيش حاجة اسمها الكمال, او الحياة الكاملة, اللى هي كل حاجة بتحصل فيها اتباعاً لقانون معين. علشان الدنيا اه ماشية بقوانين, بس مش القوانين اللى احنا بنكتشفها, هي بتعمل اللى هي عايزاه الأول, و بعدين احنا بنكتبه في قانون.

كذلك في حياة الواحد منا. بتحصلنا المشكلة الأول, او المصيبة, و بعدين نعرف منها حاجة, نكتبها في كتاب قوانين حياتنا, و نبدأ نطبقها في المواقف اللى بتيجى بعديها.

الحياة اكبر مننا احنا الاثنين على بعض يا غيداء. لسة فيه أماكن كثير تتراح, و ناس كثير تتقابل, و مواقف محرجة كثير تعرفنا اكثر على نفسنا, و حاجات هبلة كثير تعرفنا اكثر عن شخصيات موجودة في العالم حوالينا. و الواحد منا لازم يعدى بكل ده, مش علشان يوصل لحاجة, بس علشان يبقى بيتعامل احسن مع المواقف اللى هتبقى بتحصل ساعتها. التعقيدات كثير, و المعاملات كثير, و الخذلان كثير. بس ده كله في رصيد حياتنا. بيتحط فيه و بيسحب منه في نفس الوقت. علشان كده احنا مع التيار ماشيين, و مع الموجة مريحين. علشان الذبذبة الكثير بتعطل الfree flow بتاع الأشياء.

تنتوشاتك دى مش حاجة غصب. هي مش حاجة انت اللى بتعمليها علشان انت محتاجاها. لا, تنتوشاتك هي اللى محتاجاكى, و متقلقيش, هتلاقيها بتصرخ تنادى عليكى وقت ما تكونى قادرة انك تخلى بالك منها.

اما بقى لموضوع سبحتك, فانا هتوصتلك عندها. هقولها قد ايه ان غيداء دى جميلة و بتحبك, و انت ممكن تكونى اغلى عندها من بنتها, فقط لانك موجودة قبلها في الوقت. يمكن ترضى تسامحك émoticône tongue بس بجد أتمنى تكون علاقتك بيها احسن دلوقتى...

موضوع اكتشاف النفس, و عمايل حاجات تانية ممكن يكون اهم حاجة الواحد ممكن يعملها, و ممكن يكون اكثر حاجة ممكن تضيع الانسان اللى بيستخدمها في التهرب او التماطل. أتمنى تكونى بدأتى تقربى من نفسك (ايوه اللى هي جواكى دى) قربيلها اكثر, اتعرفى عليها برقة, بلاش غشامة يعنى, هي عارفة انك عايزة تتعرفى عليها, فمتقوليلهاش في وشها كده "انا عايز اتعرف عليكى", علشان ممكن تحسبك بتعاكسى و تبعد عنك و هي بتشتمك في سرها, و ده هيولد مشاعر ملهاش لازمة, و حواجز ممكن نكون في غنى عنها. يعنى خديها واحدة واحدة, احكلها حدوتة تشد انتباهها, عرفيها على حد جديد, او على حاجة جديدة هي بتحبها. يعنى داعبيها من بعيد لبعيد, خليها تتعود عليكى, و اوعدك هتفتحلك قلبها على طول.

في رسالتك الأخيرة وعدتينى بحاجات كثير. أتمنى تكونى التزمتى بوعودك, و لو مش اوى, متيأسيش, خليكى غيداء الشجاعة اللى اخدت صاحبتها و راحت الهند. انا بثق فيها اوى.

الناس يا غيداء هما ناس, في الأول و في الاخر, يعنى النفس بتغلب في اخر النهار. مهما كان الشخص بان متحكم, النفس بتغلب. مينفعش تستنى حاجة من حد. علشان هو نفسه مش ضامن اللى مستنيه من نفسه. خلى بالك من النقطة دى اوى.

غيداء انت انسانة عظيمة, و مستقبلك عظيم. ده مش معناه انك هتعيشى مستقبلك في تبات و نبات, بس معناه انك هتستغلى معاناة الحياة في انك تخففى بيها عن معاناة ناس تانية, و هتواجهى التحديات اللى بتعدى بيها بصبر و ثقة, في انك كانسانة, قادرة انك تعملى ده, و مهما كان, في الاخر عندك رب هيحط حاجات في سكتك, و يهيأ ظروف تعرفك بناس هتتعلمى منهم حاجات, او هيساعدوكى في حاجات هتهون عليكى تعب الرحلة. اهم حاجة انك تفكرى نفسك دايماً انك انسانة. يعنى بيتطبق عليكى كل مواصفات الانسانيين. اللى هو يوم فوق, و يوم تحت, و مواقف عظيمة, و ماقف ما بعدها أسوأ. بس الثابت في كل ده هو انت, و القيم اللى انت بتبنيها مع الوقت.

الناس العظيمة في حياتى غاليين عليا اوى, و دعائى ليكى هو اقل ما اقدر اقدمه... بس هفضل اقدمه.

بالتوفيق.