"رسائل ترد إلى المرسل"
عزيزي ج,
قررت انهاردة ابطل اكتب اسمك, في الأول والآخر انت ليك حق ملكية فكرية في كل الحاجات اللي ذكرتك فيها, فانهاردة يا حلو, قررت اني مش هاكتب اسمك.
كيفك؟ اتمنى تكون كويس والأمور بخير. بقالي كام يوم باحلم بيك, غريبة جدًا جدًا. باحلم بأكتر أحلام غريبة في الحياة. من يومين حلمت انك بتبعتلي تقوللي ممكن ابعتلك مزيكا؟ وانهاردة حلمت انك وصلتني للمطار عشان أهلي اتأخروا وكانوا مشغولين وفي الطريق كنت بتقولي بصي, الامور مكانتش واضحة بيننا مؤخرًا...
و صحيت.
اعتقد ان عقلي الواعي ماقدرش ينخدع خالص باللي عقلي الباطن بيحاول يبعتهولي.
مش قادرة افهم ليه عقلي الباطن بيوريني الصور دي, على الإطلاق.
عزيزي ج,
افتقد بشدة محادثاتنا العزيزة والمتفرعة في كل كل موضوع وكل حاجة صغيرة. مفتقدة بشدة هذا الود والكلام اللطيف اللي كان بيننا, مفتقداك..
مفتقداك بس في نفس الوقت انا شاكرة جدًا انك قفلت البلوج بتاعك وبكدة مابقتش اقدر اوصل لأفكارك وحياتك الخاصة. دي خطوة مهمة جدًا شكرا انك اخدتها وساعدتني بها زي ما بتساعدني دايمًا.
عزيزي ج,
انهاردة كان اول يوم دراسة لي في بولندا. قابلت واحد من التشيك وكان اسمه ايه بقى؟ توماش. على اسم مين؟ توماش من "كائن لا تحتمل خفته". عزيزي ج, انا عايزة اقولك اني قلتله يااه ! توماش من كائن لا تحتمل خفته, لميلان كونديرا, ده كاتب لطيف قوي, الرواية دي كانت من روايات حبيبي وشريكي السابق.
خلص اليوم, وانا ماشية سمعت في الطريق من حيث لا أدري "cheap thrills" اغنيتك المهيبرة المفضلة في آخر شهر لينا في مصر. افتكرت رقصنا الأهبل جدًا, محاولات تعليمي للرقص اللي باءت بالفشل لأني كنت فرحانة بجيبتي وكل شوية الف بيها, الجزمة السيفتي اللي ماكنتش عايزة اقلعها...
ذكريات كتيرة لطيفة يا حلو.
أنا متأكدة اني لو شفتك هابصلك البصة الطويلة اللي كانت في آخر لالالاند, نظرة كلها امتنان.
انا فاكرة في وداعنا كنت بتقولي انك مش فاكرلي اي حاجة وحشة. انا مش فاكرالك اي حاجة وحشة. باحاول افكر نفسي بسبب الإنفصال وباقول ان أكيد كان ممكن نعالجه بالتفاهم بس يا عزيزي الظروف مكانتش مساعدة. لونج ديستانس ريليشينشيب إز آآ بيتش.
عزيزي ج,
اتمنالك كل السعادة والحب في الدنيا, اتمنى انك تلاقي شريكة تبسطك وتحبك وتبقى حنينة عليك دايمًا ومفيش في قلبها ذرة قسوة. أتمنالك كل الذكاء العقلي اللي بيثيرك مصحوب بالكثير من البصات الطويلة وتوقفات للزمن والعالم المحيط لخطف قبلة صغيرة تقديرًا لكل اللي طلع من هذا الفم الجميل.
اتمنالك كل السعادة والحب في الدنيا, اتمنى انك تلاقي شريكة تبسطك وتحبك وتبقى حنينة عليك دايمًا ومفيش في قلبها ذرة قسوة. أتمنالك كل الذكاء العقلي اللي بيثيرك مصحوب بالكثير من البصات الطويلة وتوقفات للزمن والعالم المحيط لخطف قبلة صغيرة تقديرًا لكل اللي طلع من هذا الفم الجميل.
عزيزي ج,
كل الحب والامتنان والود. دائمًا.
غيداء
No comments:
Post a Comment