عزيزى فريد :)
خلينى اقولك ان المسج بتاعتك جت فى وقتها. انت اسعدتنى انهاردة و انا كنت فاكرة ان سعادتى هاتبقى فى حاجة تانية بس ماجاتش.
انهاردة تيقنت ان الواحد مش المفروض يتوقع من الناس كتير ، مش المفروض يهتم كتير بحد بعينه عشان الموضوع مش دايما بيبقى متبادل و ان التسرع مش الحاجة الامثل
انهاردة اتأكدت ان التوازن الداخلى هو الاساس و ان السعادة لازم يكون مصدرها الانا مش الغير
انهاردة افتكرت ان الواحد لازم يسيب دايما مسافة لنفسه و يسيب ليها حرية الحركة، التفاعل، الاندفاع و يكون عارف آخر المسافة دى كويس
التوازن الداخلى لو مكانش موجود ، هايبقى الواحد حاسس بان قلبه مقبوض و ان فى حاجة ناقصاه
فبيبتدى يدور على انه يخفف من انقباض قلبه فى الحاجات التانية و هو ناسى نفسه اللى هى الاساس
و لما ما يوصلش لنتيجة بيزهق و يتعب فى حين ان الاجابة بالمعنى الحرفى جواه...
انا اتأكدت من الموضوع ده انهاردة
و اتأكدت من حاجات كتير تانية كنت غافلة عنها
سؤالك عن تنتوشاتى بيبسطنى، بيحسسنى انك مهتم و دة شئ بيسعدنى يا عزيز
سبحتى الملونة ؟
هييح اعتقد انها زعلانة منى الفترة دى...
بعدت عنها و عن حاجات كتير ادعاء منى انى باكتشف نفسى
بس برضة انهاردة حسيت قد ايه انا محتاجاها و انها بتدينى قوة و ثقة.
انا مفتقدة سبحتى حتى لو هى جنبى و حاسة انى عشان ارجع علاقتنا زى الاول محتاجة وقت كبير...
بس ماتقلقش، هافضل وراها لحد ما الدنيا تبقى كويسة.
فريد،"بادعيلك على طول" بتأنبنى.
بحب انك بتكتبلى رسايل طويلة من وقت للتانى بدل الشات السخيف اللى مابحبوش
لكن انك تختمها بانك بتدعيلى ؟ آه يا فريدو آاه..
مش عارفة اعبر عن ازاى الكلمة دى اثرت في ، صغيرة بس اثرت فى و مش عارفة اذا كنت هاعرف افسر الموضوع ده و اللا لأ.
انا هاوعدك بحاجة ، اوعدك انى اضبط التوازن بتاعى
و اتمسك بيه و بسبحتى و ارجع العلاقة زى زمان
اوعدك انى مش هاتنازل عن انى اكون مبسوطة و انى اعمل اللى يبسطنى
و اوعدك انى مش هاستنى من حد حاجة عشان الموضوع مؤلم...
و بس.
شكرا يا فريد :) شكرا على قلبك النضيف و اهتمامك الصادق
شكرا
شكراعلى كل حاجة :)
No comments:
Post a Comment